लडेर एकको मृत्यु

१७ चैत २०७५

खोटाङ – खोटाङको जन्तेढुंगा गाउँपालिका–५ चिसापानीका ८७ वर्षीय नीरबहादुर राईको लडेर मृत्यु भएको छ। घरभन्दा केही टाढा गएर फर्कने क्रममा बिहीबार साँझ लडेर उनको मृत्यु भएको प्रहरीले बताएको छ।

बाटोभन्दा करिब ५ मिटर तल खसेका राईको टाउको ढुंगामा ठोक्किएर मृत्यु भएको जिल्ला प्रहरी कार्यालय खोटाङका डिएसपी राजकुमार केसीले बताए। प्रहरीका अनुसार राईको घटनास्थलमै मृत्यु भएको हो।

प्राथमिक स्वास्थ्य केन्द्र चिसापानीमा डाक्टर नहुँदा मृतकको शव पोस्टमार्टमका लागि उदयपुरको बेलटार पठाइएको छ। प्राथमिक स्वास्थ्य केन्द्रमा डाक्टरको दरबन्दी भए पनि नियमित डाक्टर नबस्दा सर्वसाधारण मारमा पर्ने गरेको स्थानीय दिलीप राईले बताए। गाउँकै प्राथमिक स्वास्थ्य केन्द्रमा दरबन्दी अनुसार डाक्टर नहुँदा कुनै पनि सेवा लिन अन्यत्र जान बाध्य छन्।