साप्सुधापलाई सिमसार पर्यटकीय क्षेत्र बनाइने

खोटाङ, १७ चैत्र–खोटाङको साप्सुधापलाई सिमसार पर्यटकीय क्षेत्रको रुपमा विकास गरिने भएको छ । दिक्तेल रुपाकोट मझुवागढी नगरपालिकाको वडा नं. ९ निर्मलीडाँडा सिरानमा पर्ने साप्सुधाप एक महत्वपूर्ण पर्यटकीय क्षेत्र हो । उक्त स्थानको पर्यटकीय विकासका लागि नगरपालिकाले २७ लाख बजेट विनियोजन गरेको छ । 

स्थानीयको ३० प्रतिशत जनश्रमदानमा अहिले पर्खाल, घेराबारा, प्रवेशद्धार, तालको बीचमा रेलिङ सहितको पुल तथा पर्खाल वरिपरी रेलिङ निर्माण भईरहेको छ । उक्त स्थानमा हालसम्म ५० प्रतिशत काम सम्पन्न भईसकेको उपभोक्ता समितिका अध्यक्ष भीमकुमार राईले बताए । 

गतवर्ष उक्त स्थानसम्म पुग्नको लागि ६ सय मिटर बाटोको सोलिङ र ३ वटा प्रवेशद्धार निर्माण गरिसकिएको साप्सुधापमा यो वर्ष एकवटा प्रवेशद्धार निर्माण गरिनेछ । भोजपुर, ओखलढुङ्गा, सोलुखुम्वु, उदयपुर, खोटाङ लगायतका स्थानीयवासी भाकल बुझाउन भन्दै साप्सुपूजा गर्न यस स्थानमा वर्षेनी आउने गर्छन् । 

साप्सुधापलाई सिमसार पर्यटकीय क्षेत्रको रुपमा विकास गर्नको लागि डिपिआर समेत तयार भईसकेको छ । सदरमुकाम दिक्तेलदेखि ३६ किलोमिटर टाढा पर्ने साप्सुधाप निर्माणाधिन मध्यपहाडि सडकदेखि केही माथि पर्छ । उक्त स्थानसम्म पुग्नको लागि कच्ची मोटारबाटो समेत तयार पारिएको छ । साप्सुधापमा जनैपूर्णीमा (साउन–भदौ) र कात्तिके पूर्णीमामा ठूलो मेला लाग्ने गर्दछ ।