१५ चैत २०७५ खोटाङ – खोटाङको हलेसी तुवाचुङ नगरपालिकाका व्यवसायीलाई होमस्टे व्यवसाय सञ्चालन तालिम दिइएको छ। हिन्दु, किरात र बौद्ध धर्मावलम्बीको आस्थाको केन्द्रका रुपमा रहेको त्रि–धार्मिकस्थल हलेसीमा आउने दर्शनार्थी एवं पर्यटकलाई लक्ष्यीत गरेर होमस्टे व्यवसाय सञ्चालनका लागि स्थानीयलाई आवश्यक तालिम दिइएको हो।
मध्यपहाडी लोकमार्गको जयराम–हलेसी र अर्खौलेबीचको बस्ती आसपासमा होमस्टे सञ्चालन गर्ने उद्धेश्यकासाथ ७ दिने तालिम आयोजना गरिएको घरेलु तथा साना उद्योग विकास समिति खोटाङका नासु दिनेश राईले बताए।
स्थानीयलाई होमस्टे सम्वन्धी सीप प्रदान गर्दै हलेसी क्षेत्रको पर्यटन प्रवद्र्धनका लागि घरेलु तथा साना उद्योग विकास समिति र हलेसी तुवाचुङ नगरपालिकाको संयुक्त आयोजनामा शुक्रबार उद्घाटन गरिएको तालिम बिहीबार समापन गरिएको छ।
होमस्टे सञ्चालन गरेर हलेसीको पर्यटन प्रवद्र्धन गर्दै स्थानीयलाई आर्थिकरुपमा आत्मनिर्भर बनाउनका लागि पहिलोपल्ट होमस्टे तालिम आयोजना गरिएको हो। होमस्टे तालिममा सहभागी नगरपालिकाभित्रका होटल व्यवसायी र अन्य सहभागीलाई हलेसी तुवाचुङ नगरपालिकाका मेयर इवन राईले प्रमाणपत्र प्रदान गरे।
दर्शनार्थी एवं पर्यटकको दैनिक भीड लाग्ने हलेसीमा हालसम्म होमस्टेको विकास हुन सकेको छैन। हलेसी आएका पर्यटकलाई स्थानीय अर्गानिक उत्पादन उपभोग गर्ने, स्थानीय संस्कृतिमा रम्ने, स्थानीय शैलीको घरमा बास बस्ने वातावरण बनाउनका लागि होमस्टे तालिम आयोजना गरिएको मेयर राईले बताए।
‘हलेसीमा होमस्टे सञ्चालनका लागि यो पहिलो प्रयास हो,’ मेयर राईले भने, ‘हलेसी आएका बेलामा स्थानीय अर्गानिक उत्पादनको स्वाद चाख्न चाहने, स्थानीय सामग्रीले बनेको घरमा बस्न चाहने पर्यटकलाई लक्ष्यीत गरेर होमस्टेको तालिम गरिएको हो।’
होमस्टे व्यवसायले स्थानीय उत्पादनको प्रवद्र्धनका साथै स्थानीयलाई आत्मनिर्भरताको बाटोमा डो(याउने अपेक्षा गरिएको छ। होमस्टेले हलेसीको पर्यटन प्रवद्र्धनका साथै स्थानीयलाई स्वरोजगार बन्न टेवा पुग्ने मेयर राईले बताए।
No comments:
Post a Comment