अख्तियारको कामप्रति जिल्लावासीको गुनासो

खोटाङ । अख्तियार दुरुपयोग अनुसन्धान आयोगले ‘ठूला भ्रष्टाचारीलाई समात्न नसकेको’ खोटाङमा आयोजित एक कार्यक्रमका वक्ताले गुनासो गरेका छन् । अख्तियार दुरुपयोग अनुसन्धान आयोगको कार्यालय इटहरीले मंगलबार दिक्तेलमा आयोजना गरेको भ्रष्टाचारको नियन्त्रणमा आयोगको भूमिका विषयक अन्तरक्रिया कार्यक्रममा सहभागीले ससाना भ्रष्टाचारीलाई अख्तियारले समाते पनि ठूला भ्रष्टाचारीलाई समातेर कारबाही गर्न नसकेको गुनासो गरेका हुन् ।

कार्यक्रममा सहभागि जिल्लावासीहरु ।

कार्यक्रममा सहभागी बलराम आचार्यले ‘साना माछा मात्र समातिदा’ संवैधानिक आयोगका रुपमा रहेको अख्तियारप्रतिको विश्वास गुम्ने खतरा बढेको औल्याए । सामुदायिक वन उपभोक्ता महासंघका प्रदेश सदस्य सूर्य राईले देशका विशिष्ट नेताको नाम भ्रष्टाचारमा मुछिदा समेत आयोगबाट जवाफ आउन नसकेको बताए । ‘अख्तियार आफैभित्र पनि समस्या देखिन्छ । 

ठूला मान्छेमाथि उठेका प्रश्नको जवाफ पनि जनताले पाउँदैन,’ प्रदेश सदस्य राईले भने, ‘भ्रष्टाचारको धेरैभन्दा धेरै उजुरी अख्तियारमा पर्नुपर्छ, उजुरी परेन भने बिश्वास घटेको ठहरिन्छ ।’ सामुदायिक वन उपभोक्ता महासंघकी प्रदेश सदस्य रामकुमारी राईले अख्तियारको पहुँचलाई गाउँ–गाउँमा पुयाउन आग्रह गरिन् ।

सहभागी मोहन गुरुङले नियतवस र अन्जानमा भएका अनियमिततालाई छुट्याएर दोषी पत्ता लगाएर कारबाही गर्न अख्तियारको ध्यानाकर्षण गराए । कार्यक्रममा उठेका प्रश्नको जवाफ दिँदै अख्तियार दुरुपयोग अनुसन्धान आयोगको कार्यालय इटहरीका प्रमुख सह–सचिव महेश आचार्यले कारबाही गर्नेक्रममा ठूला माछा र साना माछा’ भनेर फरक व्यवहार नगरेको बताए । 

अख्तियार दुरुपयोग अनुसन्धान आयोगमा आर्थिक वर्ष २०७४/०७५ मा खोटाङबाट शिक्षामा ९ वटा, स्थानीय तह सम्वन्धी १ वटा, उर्जा सम्वन्धी १ वटा, सिँचाई सम्वन्धी १ वटा र स्वास्थ्य सम्वन्धी १ वटा उजुरी परेको छ ।