मिर्गौला पीडित भन्छन्, “परिवारको लागि भएपनि मलाई बँचाइ दिनुहोस् !”

२२ चैत्र (खोटाङ)- दुबै मिर्गौलाले काम गर्न छाडेपछि दिप्रुङ चुइचुम्मा गाउँपालिका–७ टेम्मास्थित काहुलेका छविलाल मगरले आर्थिक सहयोगको याचना गर्नुभएको छ । गत माघ-३ गतेदेखि काठमाडौँको सुमेरु अस्पतालमा उपचार गराइ रहनुभएका ४२ वर्षीय मगरले थप उपचारका लागि सहयोगको याचना गर्नुभएको हो ।

जीवन र मरणको दोसाँधमा रहनुभएका छविलालले कसैको सहयोग पाए आफू बाँच्ने आशा रहेको बताएका छन् । “मृत्यु त एक दिन अवस्य सबैको हुन्छ नै !” उनले भने, “आफू मरेर गएपछि नाबालक छोराहरु र श्रीमतीको बिचल्ली हुने भयो । सक्नुहुन्छ भने मलाई बँचाइ दिनुहोस् । मेरा परिवार पनि बँच्नेछन् ।”

हप्तामा दुई पटक डाइलासिस गराइ रहनुभएका छविलालले आफ्नो जिम्मेवारी पूरा गर्न नपाउने हो कि भन्नेमा आशंका व्यक्त गरे । “जन्म दिइयो । हुर्काउन र कर्म दिन बाँकी छ ।” उनले भने, “यही उमेरमा यस्तो होला भन्ने लागेको थिएन । उनीहरुको भविष्यको लागि भएपनि मलाई बँचाइ दिनुहोस् !”

कमजोर आर्थिक अवस्था भएका मगर अहिले छोरी निर्मला मगर र ज्वाइँ बिमल मगरको सहयोगमा काठमाडौँको कपनमा बसेर उपचार गराइ रहेका छन् । पाँच सन्तानका बुबा छविलालको सम्पत्तीका नाममा साँढे दुई रोपनी पाखो जग्गा मात्र रहेको उहाँका छिमेकीहरुले बताएका छन् ।

घरको आर्थिक अवस्थाले नपुगेपछि ऋण काढेर उपचारका लागि काठमाडौँ पुग्नुभएका मगरको दुबै मिर्गौला फेर्नुपर्ने स्वास्थ्यकर्मीले बताएका छन् । बिहान÷बेलुका छाक टार्न समेत अरुको घरमा बनीबुतो गर्नुपर्ने अवस्थाका छविलालको दुबै मिर्गौला प्रत्यारोपण गर्नुपर्ने भएपछि मगर परिवारमा आर्थिक संकट परेको छ ।

छविलाल र उहाँकी श्रीमती देविसरा मगरको सबैभन्दा जेठी छोरी २२ वर्षीया निर्मला मगर विवाह गरेर पराइ घर गइसकेकी छिन् । मगर दम्पत्तीको चार भाइ छोराहरु अहिले माध्यमिक तहभन्दा कममा अध्ययनरत छन् ।

श्रीमानको कमाइले दैनिक छाक टार्दै आएकी देविसरालाई अहिले ठूलो आर्थिक समस्या परेको छ । श्रीमान बिरामी भएपछि उहाँको उपचारसँगै चार भाइ छोराको लालन÷पालन तथा पठन÷पाठनको जिम्मेवारी देविसराको काँधमा आइपरेको छ ।

छविलालको उपचारका लागि सहयोग रकम जुटाउन रेवती मगर र नानीमैयाँ मगरले आर्थिक संकलन अभियान शुरु गरेका छन् । उनीहरुले काठमाडौँस्थित एभरेष्ट बैङ्कमा नानीमैयाँ मगर र छविलालका जेठा छोरा प्रेम मगरको नाममा ००२००५०१२१५४७६ नम्बरको संयुक्त खाता खोलेका छन् । 

नाताले भतिजी पर्ने अभियान्ता नानीमैयाँले भनिन्, “काकाको उपचारमा ठूलो खर्च भइसकेको छ । घरको आर्थिक अवस्थाले धान्ने अवस्था छैन । मानवीय हिसाबले उहाँलाई बँचाउन सबै सहयोगी मनहरुलाई अनुरोध गरिरहेका छौँ ।” उनी थप्छिन्, “अब कति रकम लाग्छ भन्ने पनि यकिन भएको छैन । स्वास्थ्यकर्मीले दुबै मिर्गौला प्रत्यारोपण गर्नुपर्छ भनेको छ । उहाँहरुसँग गाडी भाडा समेत छैन ।”

मिर्गौला पीडित छविलालका लागि आर्थिक सहयोग जुटाउन सहयोग रसिद छपाएर गाउँगाउँमा पठाउने तयारी समेत गरिएको जनाइएको छ । विदेशमा रहेका आफन्तहरुका लागि फेसबुक पेज बनाएर अभियान थालिएको अभियान्ताहरुले बताएका छन् ।

छविलालको उपचारमा सहयोग गर्न चाहनेहरुले मोबाइल नम्बर ९८६०४६२९६६, ९८४२८७६२४२ र ९८६९०५०४१८ सम्पर्क गर्न सक्ने जनाइएको छ । स्वास्थ्य संस्थाबाट दिने छुटका विषयमा समेत पहल गरिदिन अनुरोध गरिएको छ ।