२२ चैत्र (खोटाङ)–कालोपत्रे उप्किएर दुर्घटनाग्रस्त क्षेत्र बनेको जयराम-हलेसी सडक मर्मत गरिने भएको छ । आठ वर्षअघि गरिएको कालोपत्रे उप्किएर खाल्डाखाल्डी भएपछि दुर्घटना ग्रस्त क्षेत्र बनेको च्यास्मिटारदेखि-हलेसीसम्मको ३० किलोमिटर सडक मर्मत गरिने भएको हो ।
मध्यपहाडी लोकमार्गमा पर्ने जयराम-हलेसी सडकको च्यास्मिटारस्थित प्रहरीचौकीदेखि हलेसीसम्मको जीर्ण सडक मर्मतका लागि यही चैत ८ गते आशयपत्र आह्वान गरिएको छ । कालोपत्रे उप्किँदा सवारीसाधन हिँड्नै मुस्किल पर्नेगरी खाल्डाखुल्डी बनेको सडक मर्मतका लागि पुष्पलाल मध्यपहाडी सडक आयोजनाले आशयपत्र आह्वान गरेको हो ।
सडकको ठाउँठाउँमा खाल्डाखुल्डी परेको र जोखिमपूर्ण भएकाले मर्मत गर्न सडक विभागका महानिर्देशक र हलेसी तुवाचुङ नगरपालिकाका नगरप्रमुख ईवन राईबीच गत फागुन ३० गते सहमति भएको थियो । स्वच्छन्द-भगवती निर्माण सेवाले पहिलो पटक २०६७ सालमा गरेको पहिलो ओटासिल कालोपत्रे उप्किएपछि त्रिधार्मिकस्थल हलेसी आउनेजाने पर्यटक तथा दर्शनार्थी मारमा परेका छन् ।
हाल सो सडकमा दैनिक हलेसी र दिक्तेल आउनेजाने सयौं सवारीसाधनको ओहोरदोहोर हुने गरेको छ । विशेषगरी ग्रामीण क्षेत्रका सडकमा धुलो नियन्त्रणका लागि लगाइने पिच बाँकी नरहेपछि गाडीभित्रै धुलो छिर्ने गरेको यात्रुको गुनासो छ ।
२०६७ सालमा गरिएको कालोपत्रे खण्ड मर्मत नहुँदा यात्रु जोखिम मोलेर यात्रा गर्न बाध्य बनेको हलेसी तुवाचुङ नगरपालिका ३ का वडाध्यक्ष भलाराज राईले बताए । स्थानीयका अनुसार दुर्छिमको छापडाँडा र हलेसीबीचको सडकमा सबैभन्दा बढी खाल्डाखुल्डी बनेको छ ।
प्रहरी चौकी च्यास्मिटारदेखि बडहरे र दुर्छिमदेखि हलेसीसम्मको खण्डमा कालोपत्रे उप्किँदा ‘बुङबुङ’ धुलो उड्ने गरेको छ । ठेकेदारले सिमेन्ट, बालुवा, गिटी र अलकत्रको मात्रा नमिलाई कम गुणस्तरको ओटासिल हालेका कारण आठ वर्ष नपुग्दै सडकको अवस्था कच्ची सडक सरह बनेको स्थानीयको हो ।
सडकमा स्वच्छन्द-भगवती निर्माण सेवाले २०६५ देखि २०६७ सालसम्म लगाएर ओटासिल कालोपत्रे गरेको थियो । कम्तिमा दश वर्ष टिक्नुपर्ने ओटासिल कालोपत्रे तीन÷चार वर्षमै उप्किन थालेको हो ।
ठेकेदारले आफ्नो फाइदाका लागि कम गुणस्तरको कालोपत्रे गर्न लागेपछि स्थानीयले उसबेला सडक संघर्ष समिति समेत गठन गरेको थियो । जयरामदेखि हलेसीसम्मको सडक पिच गर्ने क्रममा ठेकेदारले बस्ती नजिक बाहेकका विभिन्न खण्डमा पिच नै नगरी छाडेर हिँडेको थियो ।
No comments:
Post a Comment