साप्सुखोला पुल ठेकेदार परिवर्तन गरेर निर्माण गरिदै

२२ चैत्र (खोटाङ)–तोकिएको मिति सकिएको १५ महिना बित्दा समेत साप्सुखोलामा निर्माणाधीन पक्की पुल निर्माणको काम नसकिएपछि ठेकेदार कम्पनीको प्रतिनिधि परिवर्तन गरेर काम अघि बढाइएको छ । वि.सं. २०७३ साल मङ्सिर २२ गते शिलान्यास गरिएको जिल्लाको दक्षिणी क्षेत्र जोड्ने प्रमुख सडक खण्डमा पर्ने साप्सुखोलामा निर्माणाधीन पक्की पुलको काममा चरम ढिलासुस्ती भएपछि ठेकेदारको प्रतिनिधि परिवर्तन गरेर काम अघि बढाइएको हो ।

१८ महिनाभित्र पूरा गर्नेगरी २०७३ वैशाखमा गजुरमुखी हरिहरि निर्माण सेवा जेभीले ठेक्का लिएको पुलको लफ्याङतर्फको पिलर ठड्याउन नै दुई वर्ष लागेपछि पुरानो प्रतिनिधिका ठाउँमा नयाँ प्रतिनिधि परिवर्तन गरेर बाँकी कामलाई तीव्रता दिइएको साकेला गाउँपालिकाका प्रमुख अर्जुनकुमार खड्का ‘झङ्कार’ले बताए । 

काम द्रुत गतिमा अघि बढाउन वा ठेक्का तोड्न दबाब दिएपछि गजुरमुखी हरिहरि निर्माण सेवा जेभीले प्रतिनिधि श्याम पोखरेलको ठाउँमा दोभान निर्माण सेवाका सुरज बस्नेतलाई प्रतिनिधि बनाएर बाँकी कामको जिम्मा दिएको जनाइएको छ ।

पेटी ठेक्का लिएको दोभान निर्माण सेवाले दुई हप्तामै पुलको मात्तिमतर्फको पिलर ठड्याउने काम शुरु गरेको स्थानीयले बताएका छन् । आगामी असार मसान्तसम्ममा सम्पूर्ण काम पूरा गर्नेगरी पुल निर्माणको काम अघि बढाउन ठेकेदार कम्पनीलाई निर्देशन दिइएको गाउँपालिका प्रमुख खड्काले बताए ।

असारभित्रमा पुलको काम नसकिए सवारीसाधन आवत जावत नभएर गाउँपालिकामा ‘नाकाबन्दी’ लाग्ने अवस्था बन्ने भएकाले पुल निर्माणको काम जुनसुकै हालतमा पूरा गर्न निर्देशन दिइएको गाउँपालिका प्रमुख खड्काले जानकारी दिए । स्थानीय पूर्वाधार विकास तथा कृषि सडक विभागको दुई करोड ३० लाख ३६ हजारको लागतमा पूरा गर्नेगरी ठेक्का लागेको पुलको म्याद २०७४ साल कातिकमै सकिएको हो ।

पुल शिलान्यासका क्रममा ठेकेदारका प्रतिनिधि पोखरेलले सात महिनामै पुल निर्माणको काम पूरा गर्ने बताएका थिए । तर, शिलान्यास भएको म्याद नाघेको १५ महिना बित्दा पनि पुल निर्माणको कामले अपेक्षित गति लिन सकेको थिएन ।

हरित सडक नाम दिइएको दिक्तेल–खोटाङबजार सडक खण्डको साप्सुखोलामा निर्माणाधी पुल निर्माणको काम अलपत्र भएपछि प्रतिनिधिसभा सदस्य विशाल भट्टराईले गत कातिक ५ गते ठेकेदार कम्पनी गजुरमुखी जेभीलाई कालोसूचीमा राख्न गृहमन्त्रीसमक्ष लिखित माग राखेका थिए । सो पुलको शिलान्यास भट्टराईले नै गरेका हुन् । 

बेलायत सरकारको सहयोगमा ग्रामीण पहुँच कार्यक्रमले ११ वर्ष लगाएर २०६९ साल असारमा पूरा गरेको सडक ७४ किलोमिटर लामो छ । जिल्लाका कृषि उपज निर्यात गर्ने लक्ष्यका साथ निर्माण गरिएको हरित सडक साप्सु र तावाखोलामा पुल नहुँदा अहिले उपयोग विहीन बनेको छ ।