२१ चैत्र (खोटाङ) – थुलुङ भाषाको पाठ्यक्रम निर्माणका लागि सोलुखुम्बुको थुलुङ दुधकोशी गाउँपालिकाले १० लाख बजेट विनियोजन गरेको छ । शैक्षिक–सत्र २०७५/०७६ देखि खोटाङ, सोलुखुम्बु र ओखलढुंगाका २२ विद्यालयमा कक्षा १ बाट थुलुङ भाषाको कक्षा सञ्चालन भइरहेका बेला थुलुङ दुधकोशी गाउँपालिकाले कक्षा २ को पाठ्यक्रम तयार पार्नका लागि बजेट विनियोजन गरेको हो ।
थुलुङ दुधकोशी गाउँपालिका प्रमुख असिम राईले थुलुङ राई भाषाको पाठ्यक्रम तथा पाठ्यपुस्तक तयार पारेर लागू गर्नका लागि अगुवाई गरिरहेको थुलुङ राई संस्कृति प्रतिष्ठानको नाममा बजेट छुट्याएका हुन् । कक्षा २ को थुलुङ भाषाको पाठ्यक्रम र पाठ्यपुस्तक तयार पार्नका लागि गरिएको आग्रह अनुशार गाउँकार्यपालिकाको बैठकले वजेट विनियोजन गरेको थुलुङ राई संस्कृति प्रतिष्ठानका महासचिव पदम थुलुङले बताए ।
गाउँपालिकाले विनियोजन गरेको रकम थुलुङ राई भाषा पाठ्यक्रम बिकास केन्द्रमार्फत पाठ्यक्रम र पाठ्यपुस्तक निर्माणको काममा परिचालन गरिने प्रतिष्ठानले जनाएको छ ।
गत वर्ष विभिन्न गाउँपालिका र शुभेच्छुकको आर्थिक सहयोगमा शिशु कक्षा र कक्षा १ को पाठ्यक्रम र पाठ्यपुस्तक तयार पारेको थुलुङ भाषी अभियान्ताको आग्रहमा गाउँपालिकाले प्रतिष्ठानको नाममा बजेट छुट्याएको जनाएको छ । थुलुङ दुधकोशी गाउँपालिकाले थुलुङ भाषाको शिक्षकको व्यवस्थाका लागि समेत आश्वसन दिएको थुलुङ राई संस्कृति प्रतिष्ठानका महासचिव थुलुङले बताए ।
स्थानीय तहको कार्यान्वयनले विभिन्न भाषाभाषीमा पठन–पाठन गर्ने बाटो खुलेसँगै शैक्षिक–सत्र २०७५/०७६ बाट खोटाङ, सोलुखुम्बु र ओखलढुंगामा विभिन्न विद्यालयमा थुलुङ राई भाषामा पठन पाठन सुरु गरिएको हो ।
सोलुखुम्बूको थुलुङ दुधकोसी गाउँपालिकाका सबै वडा, ओखलढुंगाको चिसंखुगढी गाउँपालिकाको कुइभीर, खोटाङको ऐसेलुखर्क गाउँपालिकाको जलेश्वरी, महेश्वरी, ज्यामिरे, रावाबेँसी गाउँपालिकाको लामीडाँडा, दिक्तेल रुपाकोट मझुवागढीको नुनथला लगायतका थुलुङ भाषाको बाहुल्यता भएको विद्यालयमा थुलुङ राई भाषामा पठन–पाठन सुरु गरिएको हो ।
No comments:
Post a Comment