नेर्पामा फेला पर्यो अनौठो रोग, नगरपालिकाले दियो आर्थिक सहयोग

२२ चैत्र (खोटाङ) – अनौठो रोगले थलिएर बसेका खोटाङ नेर्पास्थित रामपुरका चार जना विश्वकर्मा युवायुवतीलाई दिक्तेल रुपाकोट मझुवागढी नगरपालिकाले उपचार खर्च बापत आर्थिक सहयोग गरेको छ । 

कम्मरमुनीको भाग नचल्ने रोगले बुबा वीरबहादुर र आमा लक्ष्मीमायाँ विश्वकर्माका दुई छोरीको मृत्यु हुनुका साथै तीन छोरी र एक छोरा थला परेर बसेको समाचार सार्वजनिक भएपछि नगरप्रमुख दिपनारायण रिजालको नेतृत्वमा गएको टोलीले बिहीबार पीडित परिवारको घर मै पुगेर उपचार खर्च बापत रु ५० हजार आर्थिक सहयोग गरेको हो । 

३० वर्षीया माइली छोरी कोपिला, २२ वर्षीया जन्तरी अनिशा, २० वर्षीया लखन्तरी मनिशा र कक्षा–९ मा अध्ययनरत कान्छा छोरा चेतराज विश्वकर्माको कम्मरमुनीको भाग नचल्ने रोगले थला परेर बसेको समाचार विभिन्न सञ्चार माध्यममा प्रकाशन तथा प्रशारण भएपछि नगरपालिकाको टोली उपचार खर्चसहित पीडित परिवारको घरमा पुगेर उनीहरुलाई भेटघाट गरेको छ । 

अनौठो रोगबाट ग्रसीत परिवारलाई आर्थिक सहयाता प्रदान गर्नुहुँदै मेयर दिपनारायण रिजाल ।

उपप्रमुख विणादेवी राई, प्रमुख प्रशासकीय अधिकृत, वडाध्यक्ष, नगर कार्यपालिकाका सदस्य, स्वास्थ्यकर्मी, पत्रकार लगायतको टोलीले उनीहरुलाई उपचार खर्च उपलब्ध गराउनुका साथै घर मै पुगेर अपाङ्गता परिचयपत्र समेत वितरण गरेको छ । 

घरमै पुगेर पीडित परिवारलाई भेटेपछि नगरप्रमुख रिजालले नगरपालिकाको तर्फबाट थप उपचार तथा जीविकोपार्जनमा सहयोग गर्ने आश्वशन दिए । उनले पीडित विश्वकर्मा परिवारलाई सकेको सहयोग गर्न सबैसँग आग्रह गरे । 

१३ जना छोराछोरी जन्मिएका विश्वकर्मा परिवारमा चार जना छोराछोरीको मृत्यु भइसकेको छ । २२ वर्षको उमेरमा साइली शर्मिला र २५ वर्षको उमेरमा काइली उषाको कम्मरमुनीको भाग नचल्ने रोगकै कारण मृत्युभएको हो । 

निम्न आर्थिक अवस्था भएका विश्वकर्मा परिवारमा अहिले पाँच छोरी र चार छोरा छन् । दुई जनाको सानै उमेरमा मृत्यु भएको बताइएको छ । पाँच छोरीमा जेठी छोरी सँगीता र कान्छी छोरी अस्मिता तथा छोराहरु जेठा राजेन्द्र, माइला ईन्द्रकुमार र साइला कृष्ण विश्वकर्मामा अहिलेसम्म रोग देखा परेको छैन । सँगीता विवाह गरेर पराइ घर गइसकेकी छिन् । कान्छी छोरी अहिले कक्षा पाँचमा पढ्दै छिन् ।

विश्वकर्मा परिवारमा यस्तो अनौठो रोगको समस्या माइली छोरी कोपिलाबाट शुरुवात भएको स्थानीयवासी तथा जनता आधारभूत विद्यालय नेर्पाका प्रधानाध्यापक झमप्रसाद आचार्यले बताए । “शुरुमा सपाङ्ग नै विद्यालय आउथे ।” उनले भने, “पढाइमा पनि अब्बल नै हुन्थे । बिस्तारै पाँच÷छ कक्षा पुगेपछि त्यस्तो समस्या देखिन थालेपछि विद्यालय छाडेर बस्ने गरेका छन् ।” 

हिड्ने क्रममा खुट्टा नलाग्ने, लाटिएर ढल्ने, भनेको समयमा भनेको ठाउँमा खुट्टा नपुग्ने, खुट्टाले टेक्न नमान्ने समस्याले कोपिला त थला नै बसीसकेकी छिन् । उनलाई कक्षा ५ पढ्दादेखि उक्त समस्या शुरु भएको आमा लक्ष्मीमायाँले बताइन् । 

बाल्यकालमा अरु जस्तै सपाङ्ग जीवन बिताइरहेकी कोपिलालाई अहिले सौचालय लैजान तथा एक स्थानबाट अर्को स्थानमा लैजान आमाले बोकेर लानुपर्छ । कोपिला विद्यालय जाँदा लडेको र त्यसपछि उनको बिस्तारै कम्मरमुनीको अङ्ग चल्न छाडेको जनाइएको छ । 

कम्मरमुनीको भाग नचल्ने समस्या कोपिलामा शुरु भएको १२ वर्ष पुगेको बुबा वीरबहादुरले बताए । “यहि समस्या अन्य छोराछोरीमा पनि सर्दै गएको छ ।” उनले भने, “आर्थिक समस्याले उपचार गर्न बाहिर लैजान नसक्दा थप दुई जना छोरीको पनि अवस्था जटिल बन्दै गएको छ ।” 

अनिशा र मनिषाले एसईईसम्मको अध्ययन पूरा गरेकी छन् । अनिशामा कम्मरमुनीको अङ्ग नचल्ने समास्या देखिएको पाँच वर्ष भएको जनाइएको छ । सोही समस्या मनिशामा देखा परेको दुई वर्ष भयो । अनिशा, मनिशा र कोपिलालाई अहिले आमाले नै डोहो¥याएर घर भित्र÷बाहिर गराउनुका साथै सौचालय लानुपर्ने बाध्यता छ । बोल्न, खान र बस्न सक्ने अवस्थाका उनीहरुको हेरचाह वृद्धा आमाले गर्नुपर्छ । 

कान्छा छोरा चेतराज पनि अहिले सहज तरिकाले हिँडडुल गर्न सक्दैनन् । हिड्दा उनको खुट्टाले भर दिन्न, काम्ने, लरबराउने जस्ता लक्षण देखा परेको छ । उनलाई कम्मरमुनीको भाग चलाएर हिड्न धेरै सकस हुन्छ । उनमा यो समस्या देखा परेको डेढ वर्ष भएको जनाइएको छ ।  

माइली छोरीबाट शुरु भएको कम्मरमुनीको भाग नचल्ने समस्या बिस्तारै उनीहरुको परिवारका सबै सदस्यमा देखिने सम्भावना रहेको छिमेकीहरु बताउँछन् । खेतीपाती बाहेक आयस्रोतको अन्य विकल्प नभएको विश्वकर्मा परिवारमा एक्कासी उक्त समस्या देखा परेपछि अहिले बिचल्ली भएको छ । 

उनीहरुमा देखिएको समस्याको उपचार नेपालमा सम्भव नहुने स्वास्थ्यकर्मीहरुले बताएको आफन्त तथा नगरकार्यपालिका सदस्य गंगाबहादुर विश्वकर्माले बताउनुभयो । भारतको गंगाराम अस्पतालमा मात्र उपचार हुने उनीहरुका लागि प्रति व्यक्ति रु आठ लाख लाग्ने बताएपछि झनै समस्या भएको जनाइएको छ ।

अहिलेसम्म राज्यको तर्फबाट कुनै सुविधा नपाएका पीडित विश्वकर्मा परिवारलाई नेपाली साझा मञ्चकी कार्यवाहक अध्यक्ष शारदा भुसालले नगद रु दश हजार सहित लत्ताकपडा उपलब्ध गराउनुभएको थियो । पीडित परिवारको घरमै पुगेर नगद तथा लत्ताकपडा उपलब्ध गराउनुभएकी भुसालले यसअघि मनिशालाई नेपालमा हुने सम्पूर्ण उपचार समेत गराउनुभएको थियो ।