६ वैशाख (खोटाङ) – घरेलु तथा साना उद्योग विकास समितिको अगुवाईमा गरिएको औषधी पसल अनुगमनको क्रममा म्याद गुज्रेका औषधी फेला परेपछि जफत गरिएको छ ।
यहाँको दक्षिणी क्षेत्रमा अवस्थित जन्तेढुंगा गाउँपालिकामा सञ्चालित औषधि पसलबाट म्याद गुज्रेका औषधि जफत गरिएको हो। चिसापानी बजारमा सञ्चालित एक औषधि पसलबाट ५ हजार १ सय बराबरको म्याद गुज्रेका औषधि जफत गरिएको थियो। म्याद गुज्रेका औषधि जलाइएको घरेलु तथा साना उद्योग विकास समिति खोटाङका प्रमुख रामशरण महतोले बताए।
अनुगमन समितिले औषधिजन्य, कस्मेटिक, पेयपदार्थ र खाद्यान्न समुहको अवस्थाका विषयमा तीन वटा औषधी पसलमा अनुगमन गरेको थियो। तिनीहरुमध्ये एउटैमा मात्र म्याद गुज्रेका औषधि फेला परेको हो। म्याद गुज्रेका औषधि बेच्ने पसलको नाम र औषधिको प्रकार गोप्य राखिएको छ।
जफत सामग्री गाउँपालिका प्रमुख शंकर राई, प्रमुख प्रशासकीय अधिकृत चित्रप्रसाद गुरागाई, इलाका प्रहरी कार्यालय चिसापानीका प्रहरी नायब निरीक्षक निरबहादुर कट्वाल, उद्योग वाणिज्य संघका दिलबहादुर तामाङलगायतको रोहबरमा जलाइएको छ।
अनुगमन टोलीले चिसापानीका ३० वटा पसलमा अनुगमन गरेको जनाएको छ। घरेलु तथा साना उद्योग विकास समिति नेतृत्वको अनुगमन टोली बजार छिरेर अनुगमन सुरु गरेपछि चिसापानीका कतिपय व्यवसायीले हत्तपत्त कमसल उपभोग्य सामग्री छलेको अनुगमन टोलीले जनाएको छ।
एकातर्फबाट पसलबाट अनुगमन सुरु गरेको हल्ला फैलिएपछि कतिपय व्यवसायीले म्याद नाघेका उपभोग्य वस्तु लुकाएको प्रमुख महतोले बताए। बजार अनुगमन सुरु भएको हल्ला फैलिएपछि व्यवसायी अत्तालिएका थिए।
No comments:
Post a Comment