जनप्रतिनिधिको एक महिनाको सेवा सुविधा विपद व्यवस्थापन कोषमा

साकेला (मानेभञ्ज्याङ) १३ चैत्र–  कोरोना भाइरस (कोभिड–१९) को जोखिम सामना गर्न साकेला गाउँपालिकाका जनप्रतिनिधिहरुले एक महिनाको सेवा सुविधा गाउँपालिकाको विपद व्यवस्थापन कोषमा जम्मा गर्ने भएका छन् । 

गाउँपालिका अध्यक्ष अर्जुनकुमार खड्काको अध्यक्षतामा पालिकाका पाँच वटै वडाका अध्यक्ष, गाउँपालिका उपाध्यक्ष र कर्मचारीहरुको बिहीबार बसेको आकस्मिक वैठकले सो निर्णय गरेको हो । गाउँपालिकाका २९ जना कार्यपालिका सदस्यको चैत्र महिनाको सेवा सुविधा उक्त कोषलाई उपलब्ध गराउने निर्णय भएको अध्यक्ष खड्काले जानकारी दिनुभयो । 

त्यसैगरी तावाताल निर्माणको लागि छुट्टिएको ७० लाख बजेटबाट २० प्रतिशत रकम रकमान्तर गरी सोही कोषमा राखिने भएको छ । आपतकालिन अवस्थामा खर्च गर्ने गरी उक्त कोषमा रकम रकमान्तर गरिने भएको हो । 

त्यस्तै आकस्मिक वैठकको क्रममा गाउँपालिका अध्यक्ष खड्काले घर गएका र कार्यालयमा अनुपस्थित भएका सबै कर्मचारीलाई अनिवार्य रुपमा कार्यालयमै तैनाथ रहन निर्देशन दिनुभएको छ । सम्पूर्ण सेवा प्रवाह बन्द भए पनि विपदको समयमा घरमा भन्दा कार्यालयमै रहेर अत्यावश्यक सेवा प्रवाहमा सहयोग गर्न निर्देशन दिनुभएको हो ।

यता, पालिकाले कोरोना रोकथामका लागि गाउँपालिका भित्र रहेर अध्ययन गरी खालि बसेका अनुभवी स्वास्थ्यकर्मीहरुलाई स्वयम सेवकको रुपमा परिचालन गर्ने निर्णय गरेको छ भने वैदेशिक रोजगारबाट फर्किएका व्यक्तिहरुको तथ्याङ्क संकलन गर्न सवै वडा कार्यालयलाई अनुरोध गरिएको छ ।